Choose your language
At language diversity team uun Waastfresklun
Faan a 23.-29. marts 2013 naam at language diversity team bi’t puaskseminaar faan a JEV uun Grou uun Waastfresklun dial.
Tu’t seminaar wiar auer 90 jong fertreeder faan 25 ferskeelig manerhaiden uun Europa kimen, diarmad fresken, deensken, sorben an waast-thrakien-türken ütj Tjiisklun, kaschuben ütj Polen, kärntner slowenen an burgenlandkroaten ütj Öösterrik, ladiiner an tjiisken ütj Südtirol, sowie aromunen ütj Albanien, Mazedonien, Serbien an Rumänien.
Det team natigt at seminaar tu’t amsaaten faan det kampagne för muarspriakethaid spriakelk manigfualighaid uun Waastfresklun. Liktidjig treed at team för’t iarst feer üüs „language diversity police“ ap, an testet de beruuf politsist üüs afkoot faan det kampagne. At team wiar a hiale weg presend an feerd ferskeelig aktiiwiteeten troch.
Mä halep faan auer 100 dialnemern haa wi dön lidj uun a regjuun troch spontaan aktjuunen trinjenam det taarep Grou an widjert en grateren flashmob uun’t sentrum faan Leeuwarden/Ljouwert üüb spriakelk manigfualighaid, manerhaiden uun Europa an üüb det regjuun Waastfresklun henwiset. Üüs mual wiar at, jong lidj ütj hial Europa üüs multiplikatoren för spriakelk manigfualighaid iintusaaten an mä halep faan pasanten uun Waastfresklun för muarspriakethaid tu sensibilisiarin. Wi wiset a fresk manerhaid, oober uk a holuner, det wi a fresk spriak för wichtig hual an det at uun Europa üübsidj faan’t fresk en hiale rä ööder spriaken jaft. Mä grat skäälten, huar üüs bööd uun ferskeelig spriaken üübsted an mä lastig formatjuunen wiset wi a pasanten diarüüb hen.
Arke pasant skul ham, iar’r widjerlep, för ian spriak tor – wat ütj tau fertreedern faan en manerhaidspriak diarsteld wurd – enskias, an liard do „gudai“ an „sünjhaid“ üüb deensk, kroatsk, sorbisch, aromunisk an en hiale rä ööder spriaken. Auer de spröök „Praat mar Frysk“ (snaake man fresk) üüb üüs snupkroom an üüs bruket produkten hee ham arken frööget.
Tup mä dön dialnemern ütj hial Europa, fööraal dön lidj ütj dön fokus-regjuunen faan üüs kampagne – üüs a Lausitz an a tjiisk-deensk grensregjuun – haa wi interviews am spriaken an identiteet feerd. Det an aal üüs aktiiwiteeten haa wi uun kurt filmen an podcasts feesthelen.
Üübtu bütjet ham det team mä de promotern faan a waastfresk spriak– Afûk – ütj an baud en wichtigen kontakt tu det kampagne „Praat mar Frysk“ („Sprich doch Friesisch“) ap
muar biljen: http://pinterest.com/languaged/
tu dön podcasts:
